| |
Upplestur í dimmalættingini og í
skýmingarløtuni
 Í
øllum Norðurlondum uppliva vit stuttar heystar- og vetrardagar. Í gomlum
døgum, áðrenn vit fingu sjónvarp og teldu í hvørt hús, var vanligur siður,
at fólk nýttu hesar myrku vetrardagar til at siga hvørjum øðrum søgur.
Mánadagin 10. november fær hesin gamli norðurlendski siður nýtt lív, tá
Norðurlendska bókasavnsvikan byrjar fyri 12. ferð. Tað verður ein vika á
tremur við upplestri, orðaskifti, framsýningum og ymiskum mentanarligum
tiltøkum í skúlum, á bókasøvnum og í ymiskum feløgum í Norðurlondum og
Baltalondum.
Heimsmet í upplestri
Kanska verður eitt nýtt heimsmet
sett 10. november, tí tá fara fólk í túsundatali at savnast í meira enn
2000 ymiskum hølum í Norðurlondum fyri at hoyra upplestur samstundis.
Upplesturin verður úr einum nýggjum teksti, sum finski rithøvundurin Eeva
Kilpi hevur skrivað, og hann verður týddur til øll málini í Norðurlondum.
Longu um morgunin hendan sama dagin luttaka skúlabørn úr øllum
Norðanlondum í tiltakinum Dimmalætting, og her hoyra tey upplestur úr
bókini ”Gandakellingin Flumbra”, ið íslendska Guðrun Helgadóttir hevur
skrivað. Harafturat eru eisini aðrir tekstir fyri størru børnini.
Ókeypis tilmelding
Bókasøvn, skúlar og feløg kunnu
melda seg til tiltakið – sum er ókeypis – her á heimasíðuni, og øll, sum
melda seg til, fáa ókeypis plakatir og postkort. Tað ber eisini til at
taka upplisnu tekstirnar og hugskotsskrá niður frá heimasíðuni.
Vælkomin til Norðurlendsku bókasavnsvikuna – og hugnaliga og gamaldags
søgufrásøgn í rættari norðurlendskari siðvenju.
|
|
